Шымкент қаласы Сейітжан қари мешітінде «Ислам және адал қоғам» жылы аясындағы «Дәстүр және отбасы » бағыты бойынша қазақ халқының ұлттық дәстүрі – тұсау кесер рәсіміне арналған тағылымды іс-шара өтті.
Шара барысында Ислам дініндегі бала тәрбиесінің маңыздылығы кеңінен насихатталып, ұрпақ тәрбиесіндегі ата-ананың жауапкершілігі жайлы әсерлі уағыз айтылды. Сонымен қатар, қазақ халқының салт-дәстүріндегі тұсау кесердің мәні, тәрбиелік маңызы мен шариғатқа қайшы келмейтін тұстары жан-жақты түсіндірілді.
Іс-шара барысында Ескендір балапанымыздың тұсауы кесіліп, ақ жаулықты әжелеріміз ақ баталарын берді. Шашу шашылып, келген қонақтарға сыйлықтар үлестіріліп, ізгі тілектер айтылды.
Шара соңында қасиетті Құран хатым дұғасы жасалып, ата-баба рухтарына бағышталды. Сондай-ақ, еліміздің амандығы мен жеріміздің тыныштығы, жас балапанымыздың иманды, саналы ұрпақ болып өсуі үшін дұға жасалды.
